හිම කඳුකරයේ සංචාරය
මේ බ්ලොග් සටහන ඔස්ට්‍රේලියාවෙ නිව් සවුත් වේල්ස් ප්‍රාන්තයේ තියෙන හිම කඳුකරයට (Snowy mountains) රුචික රූල කණ්ඩායම කරපු සංචාරය ගැනයි.
ඔස්ට්‍රේලියාව කියන්නෙ රටක් වගේම මහද්වීපයක් කියලා ඔයාලා දන්නවා ඇති. ඔස්ට්‍රේලියාවේ බටහිර සහ මැද විශාල භූමි ප්‍රමානයක් කාන්තාර. ඒවගේම උතුරු ප්‍රදේශය (Northern Territory) සහ ක්වීන්ස්ලෑන්ඩ් ප්‍රාන්තය නිවර්තන වනාන්තර බහුල ප්‍රදේශයක්.දකුනු නිව්සවුත් වේල්ස් සහ වික්ටෝරියා ප්‍රාන්තය පුරා පැතිරුන ඔස්ට්‍රේලියානු ඇල්ප්ස් කඳුකර ප්‍රදේශයට අයත්වෙන කඳු පන්තියක් තමයි snowy mountains කියන්නෙ. මේකට ඔස්ට්‍රේලියානු මහද්වීපයේ ඇති උසම කඳු පහක් අයත් වෙනවා. ඒ අතර ඔස්ට්‍රේලියාවේ උසම කන්ද වන Kosciuszko කන්දත් අයිතියි.
ඔස්ට්‍රේලියානු ශීත ඍතුව වන ජූනි සිට අගෝස්තු කාලයේ මේ කදුකරයට හිම පතිත වෙනවා. මේත් එක්කම ඔස්ට්‍රේලියානු වැසියන් බොහොමයක් හිම ක්‍රීඩා කිරීමට මෙහෙ යනවා.
හිම ක්‍රීඩා කිරීම සඳහා ප්‍රසිද්දියක් උසුලන හිම නිකේතනයක් පිහිටා තියෙන්නෙ පෙරිශ වැලී (Perisher Valley) කියන පැත්තෙ. සිඩ්නි නුවර සිට කිලෝමීටර 500ක් පමණ දුරින් පිහිටි මෙහෙට යාමට නම් කාරයකින් යායුතුයි. රුචික රූප කණ්ඩායම තවත් මිතුරන් දෙදෙනෙකු සමග කාරයකින් යන්න පිටත් උනේ සිකුරාදා දිනයක උදේ 10ට පමණ. ගමන් මාර්ගය වැටී තිබුනේ කැන්බරා නගරය හරහා බැවින් දිවා ආහාරය අපි ගත්තේ එහි තිබූ ඉන්දියන් කඩයකින්. Snowy mountains අසල නවාතැන්පලවල් මිලෙන් ඉහල බැවින් අප රාත්‍රිය ගත කිරීමට කූමා (Cooma) නගරයෙන් කාමර කලින්ම වෙන්කරවා ගත්තා. රාත්‍රී දෙකක් සඳහා ඔස්ට්‍රේලියානු ඩොලර් 300ක් පමන වියදම් උනත් එම කාමර වැසිකිලියක් සමග ඉතා පිරිසිදුව තිබුනා. කූමා වෙත ලඟාවෙන විට රාත්‍රී 6 පමණ උනත් අපි කෙලින්ම ගියේ පසු දිනට අවශ්‍යවන හිම ක්‍රීඩා උපකරන කුලියට ගැනීමට. හිමේ කරන ප්‍රදානම ක්‍රීඩා දෙකක් නම් snowboarding සහ ski. රුචික රූප කැන්ඩායම snowboarding උපකරණද අපේ මිතුරන් ski උපකරනද ගත්තේ පසුව හුවමාරු කරගෙන සෙල්ලම් කිරීමේ අදහසින්. මේ සඳහා ඩොලර් 150ක් පමණ වැය උනා. ඒත් සමගම හිම ඇඳුම්, සපත්තු සහ අමතර ඩොලර් 8කට හිස්වැසුමක්ද ලැබුනා.
කූමා නගරයේ අවන්හලකින් ගත් රාත්‍රී අහාරයෙන් පසුව නින්දට ගිය අපි පසුදින උදේ 6ට පමන perisher valley බලා පිටත් උනා. පැය 1ක පමන ගමනකින් පසු උදේ 7ට පමන එහි ලඟාවන විටත් විශාල වාහන පෝලිමක් එහි තිබුනා. උදෙන් පැමිනි නිසා අපට වාහනය ගාල් කිරීමට අපහසු උනේ නෑ. එහි පැමිනි ලොකු කුඩා සියලු දෙනා වාහනවලින් බැසගත් ගමන්ම තමන්ගේ හිම ඇදුම් පැලඳ ගත්තේ හැකි ඉක්මනින් ක්‍රීඩා කිරීමටයි. ඉක්මනින් ඇදගත් අපද හිම ක්‍රීඩා කරන ප්‍රදේශයට ගියේ ඒගැන අවබෝදයක් ගැනීමටයි. හිම කන්දක් උඩට කේබල් කාර් මගින් යාමට ඩොලර් 300ක් පමන වැයවන නිසාත් මේ අපගේ පලමු හිම අත්දැකීම නිසාත් ඒතරම් මුදලක් වැයකිරීම ණුවනට හුරු නොවනබව තේරුම් ගත් අපි, රථ ගාල අසල පිහිටි හිමෙන් වැසුනු කුඩා කඳු ගැටයක් වෙත ගියේ පලමුව පුරුදු වීමටයි. මුලදී ලිස්සන නිසා බියක් දැනුනත් එකිනෙකාගේ උදව් ඇතිව කෙටි දුරවල් මුලින් පුරුදු උනා. මෙහිදී ski කිරීමට වඩා snowboarding කිරීම අපට පහසු උනා. ටික වේලාවක් පුරුදු වීමෙන් පසුව කුඩා බෑවුමක් ඇති ප්‍රදේශයකට ගොස් පහතට ඒමට අප සැමදෙනාටම හැකි උනා. මෙහිදී අමාරුම කාර්‍යය උනේ snowboard පුවරුව ඒ සඳහා විශේශිත සපත්තුවලට සවිකරගෙන කෙලින් සිටීමයි. මන්දයත් බෑවුමේ ලිස්සන නිසා තව කෙනෙකු තදින් අල්ලාගෙන සිට අත හැරීමට අවශය උනා. කෙසේ වෙතත් බෑවුමේ අවසානයට ලන්වෙන කොට බිම ඇද වැටීමනම් සිදු උනා. දහවල් ආහාරය සහ හැන්දෑ තේ පානය එතනින්ම ලබාගත් අපි සවස 4ට පමන පිටත් උනේ සවස 6ට පෙර හිම උපකරන නැවත භාරදිය යුතු නිසා.
පසුදින උදේ 8ට පමන නවාතානෙන් පිට උන අපි සිඩ්නි වෙත පැමිනීමට යොදා ගත්තේ වෙනත් මාර්ගයක්. අපට අවශ්‍ය උනේ පරිසරය නරබමින් පැමිනීමටයි. ඒ සඳහා ටියුමිට් (Tumut) නම් නගරය හරහා ඒමට අපි තීරනය කලා. ඒ එන අතර හිමෙන් වැසීහිය දැකුම්කලු කඳු සහ තැනිතලා පසුකරමින් පැමිනියා. අතර මගදී Yarrangobilly ගල්ගුහා සංකීර්ණය බලන්න යන්නත් අප අමතක කලේ නෑ. Glory hole නම් මේ ගල්ගුහා සංකීර්නය තුලට ඇතුලු වන තැන ඉහලින් අහස දිස්වන විශාල විවරයක් තිබෙනවා. එය ඉතා සිත් ඇදගන්නා සුලු දර්ශනයක්. ගල්ගුහා තුලට යාමට මග සකසා ඇති නිසා අප ඒ සඳහා පිටත් උනා. ගුහාවේ පොලව උඩින් වැටෙන ජලයෙන් තෙත්වී තීබීමත් සමහර තැන්වලදී හිස පහත් කරගෙන පඩි නැගීමත් ගමන ටිකක් අභියෝගාත්මක එකක කලා. දිගු කලක් ජලය බින්දු බින්දු වැටීමෙන් ගුහාවේ වහලයේ ලවන බැඳී තිබුම ආකාරය චමත්කාරජනක අත්දැකීමක් උනා. ඉන් පිටතට පැමිනි අප අසල ඇති උණු වතුර ලිඳකින් නාගෙන නැවත ඒමට පිටත් උනා. ටියුමිට් වලදී දිවා ආහාරය ගත් අපි පැය 6ක පමන ගමනකින් පසුව සිඩ්නි වෙත ලඟා උනා.
මේ ගමන විශේශිත උනේ අප සැමගේ පලමු හිම අත්දැකීම මෙයවූ නිසා. තවද සත්ව පාලනය හා බැඳුනු නිව් සවුත් වේල්ස් ප්‍රාන්තයේ ගැමි ජීවිතය දැක ගන්නත් අඔඅට ලැබුනේ හැම තැනම තිබෙන බැටලු සහ ගව පට්ටි නිසා. සතුට සහ විනෝදය අතරේ ශෝකය දනවන කාරනයක් තිබුනනම් ඒ තමයි වාහන වල ගැටී මග දෙපස මැරී වැටී සිටි කැන්ගරුවන් විශාල ප්‍රමානය. කෙසේ වෙතත් මේ ගමන ජීවිතයේ අමතක නොවන අත්දැකීමක් ගෙනෙදෙන්නට සමත් උනා කිව්වොත් නිවැරදියි.
වැඩිදුර පින්තූර බලන්න ලයික් කරන්න රුචික රූප ෆේස්බුක් පිටුව
මේ සංචාරය සහ අනෙකුත් සංචාර ගැන බලන්න සබ්ස්ක්‍රයිබ් කරන්න අපගේ youtube චැනලය.
